’وینا ملک کو طالبان کی دھمکی‘

پاکستان کی معروف اداکارہ وینا ملک نے کہا ہے کہ انڈیا کے ایک ٹی وی شو میں شرکت کرنے کی وجہ سے طالبان نے انہیں جان سے مارنے کی دھمکی دی ہے۔

وینا ملک ان دنوں انڈیا میں ہیں جہاں وہ ایک ٹی وی چینل پر کرکٹ کمنٹری کے پروگرام کی میزبان ہیں۔

نامہ نگار علی سلمان کے مطابق اداکارہ وینا ملک کے مینیجر کا کہناہے کہ انہیں یہ دھمکی ایک ایسے مبینہ خط کے ذریعے ملی جو ہاتھ سے تحریر کیا گیا ہے۔

یہ خط بظاہر تحریک طالبان کے کسی لیڈر مولانا احمد مسعود کی جانب سے لکھاگیا ہے جس میں انہوں نے کہا کہ وہ وینا ملک کو سزا دینے کا فیصلہ کرچکے ہیں۔

وینا ملک ان دنوں دلی میں ہیں جہاں وہ ایک ٹی وی چینل پر کرکٹ پروگرام کی میزبان ہیں۔ لاہور میں ان کے منیجر سہیل راشد نے بی بی سی کو ٹیلی فون پر بتایا کہ یہ خط وینا ملک تک پہنچ چکا ہے۔اس خط کی ایک نقل بذریعہ انٹرنیٹ بی بی سی کو بھی موصول ہوئی ہے۔

وینا ملک نے ستمبرسے دسمبر کے دوران انڈین ٹی وی چینل کے ایک شو میں شرکت کی تھی جس کے چند مناظر پر پاکستان کے بعض مذہبی اور دیگر حلقوں نے اعتراض کیا تھا۔

وینا ملک کے مینیجر سہیل راشد سے پوچھا گیا کہ کیا یہ خط بھی سستی شہرت حاصل کرنے کا کوئی ایسا نیا ہتھکنڈہ تو نہیں جو عام طور پر شوبز سے تعلق رکھنے والی شخصیات اپناتی ہیں؟وینا ملک کے منیجر نے کہا کہ یہ براہ راست جان کو خطرہ ہے اور ویناملک انتہائی سنجیدہ ہیں۔

انہوں نے کہا ہے کہ وینا ملک نے کہا ہے کہ اگر ان کی کسی بات پر کسی کی دل آزاری ہوئی ہے تو وہ اس کی معذرت کرتی ہیں لیکن ساتھ ہی ساتھ انہوں نے یہ بھی کہا کہ وہ خوفزدہ نہیں ہیں اور اپنے وطن پاکستان واپس ضرور آئیں گی اور فی الحال ان کا کسی دوسرے ملک میں سیاسی پناہ لینے کا کوئی ارادہ نہیں ہے۔